sistemo

*sistem/o

1. Harmonia tutaĵo de interdependaj ideoj, kunordigitaj laŭ malmultaj fiksitaj principoj: religio aŭ religi-anstataŭanta sistemo (Z); la filozofia sistemo de Platono, de Kartezio, de Kantio; tiun ĉi araneaĵon da sistemoj disŝiras la sola vorto: vi devas morti! (Z).

2. Metodo de klasifikado, serĉado, eksperimentado ks, organizita laŭ antaŭe pripensita plano aŭ gvidanta ideo: la sistemo de Lineo.

3. [SOCIOLOGIO] Maniero, kiel ekonomiaj aŭ politikaj aferoj estas celtrafe aranĝitaj: socia sistemo; sistemo de regado, de balotado, de elektoj.

4. Kompleksaĵo, kunaranĝo de aĵoj diversaj, sed analogaj, aŭ partoj en organizitan tuton: [TEKNIKOJ] sistemo de pulioj; artikigita sistemo; [GEOGRAFIO] sistemo de montoj, de riveroj; [ASTRONOMIO] la Suna sistemo (Suno kaj planedoj); [FIZIKO] sistemo de fortoj, de ekvacioj (ligantaj samtempe plurajn variantojn); fermita sistemo (ŝirmita kontraŭ eksteraj influoj); [ELEKTRO] sistemo unufaza, trifaza, trikonduktila sistemo.

5. [GEOLOGIO] Kronostratigrafia unuo, ampleksanta plurajn seriojn, responda al la geokronologia unuo periodo.

6. [ANATOMIO] Tuto de la organoj aŭ histoj, kune helpantaj por unu sama funkcio: la centra nerva sistemo (encefalo kaj mjelo); la periferia nerva sistemo (ĉiuj nervoj konektantaj la organojn al la centra nerva sistemo); la aŭtonoma nerva sistemo (tuto de la simpataj kaj parasimpataj nervoj); la digesta sistemo (nutrokanalo kaj al ĉi konektitaj organoj: hepato, pankreato ktp); la spira sistemo.
   aparato.

7. [SCIENCOJ] Aro de unuoj, elektitaj por povi esprimi la ĉefajn mezurojn en simpla kaj racia maniero: la Gaŭsa sistemo (Vd gaŭsaj unuoj)
   cgs, mks, SI.

8. [ELEKTRO] [TELEKOMUNIKOJ] Teknika procedo, uzata por difinita funkcio: aŭtomata, duonaŭtomata, mana sistemo; la telegrafia sistemo de Morso, de Simenso, de Baŭdo.